Къэрэшей-Шэрджэсым Жылагъуэ кӏэлъыплъакӏуэ комиссэм и лӏыкӏуэхэм къыщапщытащ МВД-мрэ ФСИН-мрэ я ӏуэхущӏапӏэхэм цӏыхухэр зэрыщаӏыгъ щӏыкӏэр.
Къэрэшей-Шэрджэс Республикэм ЩЫӀЭ МВД-м И Жылагъуэ советымрэ Жылагъуэ кӏэлъыплъакӏуэ комиссэмрэ хэт иерей Гурин Александр полицэм и лэжьакӏуэхэм я гъусэу Щыӏащ Урысейм Усть-Джегутинскэ районымкӏэ И ОМВД-м щаубыдахэм папщӏэ пэш щхьэхуэхэм.
Къэпщытэныгъэм хэтхэм пэшхэр зэпаплъыхьащ, унагъуэ, санитар щытыкӏэхэр къалъытащ, яубыдахэми епсэлъащ. Цӏыхухэм тхьэусыхафэ жаӏакъым полицэм и лэжьакӏуэхэм я ӏуэхущӏафэхэм е зэраӏыгъ щӏыкӏэм теухуауэ.
Иерей Гурин Александри яубыдахэм епсэлъащ хабзэр зэрагъэзащӏэм, хабзэм къемызэгъ ӏуэхухэм папщӏэ жэуаплыныгъэм теухуауэ.
Апхуэдэ дыдэу Къэрэшей-Шэрджэсым И Жылагъуэ кӏэлъыплъакӏуэ комиссэм хэтхэу Атабиевэ Мариерэ иерей Гурин Александррэ Прикубанскэ районым ЩЫӀЭ СИЗО-1-м щыӏащ.
Ӏуэхущӏапӏэм и унафэщӏхэмрэ уголовнэ-гъэзэщӏакӏуэ системэм цӏыхум и хуитыныгъэхэр гъэзэщӏэнымкӏэ ОФСИН-м и унафэщӏым и дэӏэпыкъуэгъу Кимкетов Радикрэ я гъусэу абыхэм зыщаплъыхьащ хозяйствэ ӏуэхутхьэбзэхэр щыхуащӏэ гупым и общежитхэмрэ посылкэхэмрэ нэтынхэмрэ къыщыӏах пэшымрэ.
Ӏуэхущӏапӏэм щаӏыгъ цӏыхухэм епсэлъащ икӏи зэрыпсэуну щӏыкӏэмрэ медицинэ къызэгъэпэщыныгъэмрэ щӏэупщӏащ. Жылагъуэ кӏэлъыплъакӏуэ комиссэм теухуа тхьэусыхафэхэмрэ лъэӏухэмрэ къыӏэрыхьакъым.
Кӏуам кърикӏуахэм ӏуэхущӏапӏэм и унафэщӏхэм тепсэлъыхьащ.