ОВЗ узыфэ зиIэ сабийхэмрэ щӏалэгъуалэмрэ защӏэгъэкъуэнымкӏэ «Солнечный городок» центрым и президент Земцевэ Екатеринэ Донецк, Луганск Цӏыхубэ Республикэхэм егъэджэныгъэмкӏэ я ӏэнатӏэм и унафэщӏхэм папщӏэ егъэджэныгъэ программэм и ӏэщӏагъэлӏу къэуващ. Зэӏущӏэр щекӏуэкӏащ «Сенеж» управленэм и лъэщапӏэм.
Земцевэ Екатеринэ тепсэлъыхьащ «Солнечный городок» центрым и лэжьыгъэмрэ и проектхэмрэ. Абы и зэфӏэкӏым зыщагъэгъуэзащ ӏуэхущӏапӏэ хэхахэм, щӏэныгъэ щрагъэгъуэт ӏуэхущӏапӏэхэм я унафэщӏ, чэнджэщэгъу, егъэджакӏуэ 370-м щӏигъум.
Земцевэ Екатеринэ щӏэныгъэ-къэхутакӏуэ къудамэм и унафэщӏщ икӏи Ставрополь къэрал педагогикэ институтым Ессэнтӏыгу щиӏэ къудамэм щӏэныгъэ хэха, инклюзивнэ егъэджэныгъэмкӏэ и кафедрэм и дэӏэпыкъуэгъуу мэлажьэ.