Ессэнтӏыгу дэт «Анэхэм папщӏэ унэ» кризис центрым хабзэ зэрыхъуам тету япэ классым кӏуэхэм махуэшхуэ щрагъэкӏуэкӏащ.
Гъэ еджэгъуэщӏэм и пэщӏэдзэм ирихьэлӏэу дэӏэпыкъуэгъу хъуащ гъащӏэм щытыкӏэ гугъу щихуа унагъуэхэм щыщ сабии 180-м. Ахэр псори центрым и нэӏэм щӏэтщ. Абыхэм ящыщщ япэ классым кӏуэ цӏыху 40.
Щӏалэхэм иратащ школ ӏэмэпсымэхэр, къэлътмакъхэр, щыгъынхэр. Унагъуэхэм апхуэдэ дэӏэпыкъуныгъэ щагъуэт «Анэм я унэм» пщӏэншэу япэ лъэӏукӏэ.
Центрым фӏыщӏэ щыхуащӏ сабийхэр школым хуэгъэхьэзырынымкӏэ сэбэп хъуа псоми: «Золушка» тыкуэнхэм я сетыр, «Согаз-Мед „Страховой компание“ АО-р, «Биотест» клиникэр, «Гум къыщыщӏэдзауэ гум нэс» зэщӏэхъееныгъэр, «БизнесЮг» зэгухьэныгъэр, Ессэнтӏыгу администрацэм и архив къудамэр.
«Фаворит» макъамэ театрыр махуэшхуэ щытыкӏэ къызэгъэпэщынымкӏэ сэбэп хъуащ. Центрым и волонтёрхэм сабийхэм хузэхуахьэсащ фӏыуэ ялъагъу школ къэлътмакъхэр.