Чристэн тхылъым и махуэм ирихьэлIэу Кислосодск къалэм и Чристэн Свято-Никольскэ классическэ гимназием зэIущIэ щрагъэкIуэкIащ духовнэ темэм теухуауэ тхэхэр ирагъэблагъэри. Гимназием и унафэщI щоджэн нэхъыжь Знаменский Иоанн Пятигорск епархием хъыбарегъащIэ-тхылъ тедзапIэмкIэ и къудамэм и лэжьакIуэхэу Осининэ Мариерэ Христосовэ Еленэрэ яригъэцIыхуащ икIи еджакIуэхэм яжриIащ щIэблэм я гъэсэныгъэмрэ щIэныгъэмрэ чристэн литературэм щиубыд увыпIэр зыхуэдэр. Осининэ Марие утыку кърихьащ тхылъитI: томитI хъу «Святые наших дней» тхылъыр, Пятигорск епархием Тхьэм папщIэ бэлыхь зрагъэшэча, гуэныхьхэр зыIуэтэжа и щихъхэм ятеухуар, «Живые помощи» романыр. «Золотое перо Руси - 2025» Лъэпкъ литературэ саугъэтым и «Историческое наследие» Iыхьэм лауреат щыхъуар. Тхыгъэм лъабжьэ хуэхъуащ гъащIэм, Урысей Ипщэм и къэзакъ станицэхэм къыщыхъуа Iуэхур. Абы щытопсэлъыхь тхыгъэр зытхам и унагъуэм и къекIуэкIыкIам, архив дэфтэрхэмкIэ щIигъэбыдэжу. Христосовэ Еленэ утыку кърихьащ «Лик Кавказа» хъыбарегъащIэ-публицистикэ газетым и «Книги о казаках» напэкIуэцIым традзэ, чристэн тхакIуэхэм я тхыгъэхэм щыщ Iыхьэхэм. Ар тепсэлъыхьащ «Тэрч сборник» къыдэкIыгъуэм зэрелэжьым, и адэ, журналист цIэрыIуэ Дядиченкэ (Христосов) Владимир теухуа, «Дети войны» зыфIаща документальнэ повестми и гугъу яхуищIащ. ЕгъэджакIуэхэмрэ класс нэхъыжьхэм щIэсхэмрэ щепсалъэм, урысыбзэм и къабзагъэм, тхыгъэхэр щагъэхьэзыркIэ IэрыщI интеллектыр къызэрагъэсэбэпым къытеувыIащ. НыбжьыщIэхэр тепсэлъыхьащ литературэм. ХьэщIэхэм щIалэгъуалэм зыхуагъэзащ урыс классикхэм я тхыгъэхэм еджэну, я унагъуэм, лъэпкъым я тхыдэм зыщагъэгъуэзэну.